Sot, më 19 nëntor 2024, Ambasadori i Bashkimit Evropian në Kosovë dhe Përfaqësuesi Special i BE-së, Aivo Orav, realizoi një takim me z. Yll Buleshkaj, Drejtor i Agjencisë për Parandalimin e Korrupsionit (APK).
Ky takim njoftues u zhvillua në kuadër të vizitave të Ambasadorit Orav në institucionet dhe agjencitë e pavarura të Kosovës, pas marrjes së detyrës së tij më 1 shtator 2024.
Ambasadori Orav shprehu mbështetjen e vazhdueshme të Bashkimit Evropian për APK-në, duke theksuar rëndësinë e partneritetit strategjik në luftën kundër korrupsionit. Drejtori Buleshkaj prezantoi aktivitetet dhe arritjet e APK-së, duke përmendur nevojat për burime shtesë financiare dhe njerëzore si sfida kyçe. Ai theksoi gjithashtu rolin e rëndësishëm të BE-së përmes mbështetjes konkrete siç është projekti PECK III.
Delegacioni i BE-së përfshinte Ambasadorin Orav, Jarmo Helppikangas (Shef i Seksionit për Sundim të Ligjit, Çështje Ligjore dhe të Drejtat e Njeriut), Argjend Zhubin (Këshilltar Ligjor) dhe Massimiliano Prozzo (Task Menaxher).
Agjencia për Parandalimin e Korrupsionit falënderon Zyrën e BE-së në Kosovë për mbështetjen e saj të vazhdueshme dhe përkushtohet të avancojë transparencën dhe integritetin institucional në vend.
